هذوله احنه
سرجنه الدم على اصهيل الشگر
ياسعود
خلينه زهر النجوم
من جدح الحوافر
سود
تتجادح عيون الخيل
وعيون الزلم بارود
وياخذنه الرسن
للشمس
من زود الفرح
ونزود
يسعود احنه عيب نهاب يابيرغ الشرجيه
هذي يشامغ الثوار تبرج نار حربيه
حزمنه افلاك دم
يسعود
يتلاله الفشگ بيهة
لومسنة عرج ثوار
گومو
انگوم نفنيهة
نشاگيهة بخناجرنة
نتلاعبلك لعب بيها
واتهل المناجل
بيض
كل الدنية تضويهة
يسعود احنه عيب انهاب يا بيرغ الشرجيه
نجمة الغبشه ثايتنه على حدود الحراميه
سعد ياسعود
يمصنگر
عله الحومة
غضب أرگط
يسهرك
من يشگ الليل
نجم ذويل
ايعطهم عط
صيحاتك تهز الموت
كل صيحه
بألف أمعط
وأخيتك تنذر الدينه
من تشوف العدو ينحط
يسعود احنه عيب انهاب يا بيرغ الشرجيه
خله الدم يجي طوفان كلنه انخوض عبريه
كحلنالك الف مشحوف
يمشي بهبيه للدوله
وعلگنالك عله الصوبين
علگة
عيون مشتعله
بنادقنه تطرز الليل
تضوي الكلفه والسهله
تحذر
ياشهم يسعود
حكام المدن دفله
لاتامن حچي بلاساس يابيرغ الشرجيه
عين الذيب عيب تنام من اتصوفر الحيه
هذوله أحنه
نحد السيوف
بركاب الصگر والذيب
مانترك أثر
يسعود
من انغير بس الطيب
وتولج عيون الخيل
عجه اتطير
وعجه اتغيب
ينخل فشگ ليل الموت
وعيونك ليالي زبيب
يسعود احنه عيب انهاب يا بيرغ الشرجيه
نجمة الغبشه ثايتنه على حدود الحراميه
هذوله احنه بأمل يسعود
كل نجمه انتلگاها
نمد الها البسط
دم ذيب
وندكك گهوه وياها
نسايلهة عن اخبارك
تعوگ ليش نتباهة
وعشايرنه عشاير ثار
بس اندهه
تلگاها
يسعود احنه عيب انهاب يابيرغ الشرجيه
هذي ايشامغ الثوار تتبرج نار حربيه
ليست هناك تعليقات:
إرسال تعليق