الريل وحمد

مرّينه بيكم حمد , واحنه ابغطار الليل واسمعنه , دگ اگهوه ...

وشمينة ريحة هيل

يا ريل ...

صيح ابغهر ...

صيحة عشج , يا ريل

هودر هواهم ,

ولك ,

حدر السنابل گطه

يا بو محابس شذر , يلشاد خزامات

يا ريل بللّه .. ابغنج

من تجزي بام شامات

ولا تمشي .. مشية هجر ...

گلبي..

بعد ما مات

وهودر هواهم

ولك

حدر السنابل گطه

جيزي المحطة..

بحزن ..

وونين ..

يفراگين

ما ونسونه ,ابعشگهم...

عيب تتونسين

يا ريل

جيّم حزن...

اهل الهوى امجيمين

وهودر هواهم

ولك

حدر السنابل گطه

يا ريل

طلعوا دغش...

والعشگ چذابي

دگ بيّه كل العمر...

ما يطفه عطابي

تتوالف ويه الدرب

وترابك ..

ترابي

وهودر هواهم

ولك..

حدر السنابل گطه

آنه ارد الوگ لحمد .. ما لوگن لغيره

يجفّلني برد الصبح ..

وتلجلج الليره

يا ريل باول زغرته...

لعبته طفيره

وهودر هواهم

ولك .. حدر السنابل گطه

چن حمد....

فضة عرس

چن حمد نركيله

مدگگ بمي الشذر

ومشلّه اشليله

يا ريل....

ثگل يبويه..

وخل أناغيله يمكن اناغي بحزن منغه...

ويحن الگطه

كضبة دفو , يا نهد

لملمك ... برد الصبح

ويرجفنك فراگين الهوه ... يا سرح

يا ريل....

لا.. لا تفزّزهن

تهيج الجرح

خليهن يهودرن..

حدر الحراير گطه

چن كذلتك...

والشمس...

والهوة...

هلهوله

شلايل برسيم...

والبرسيم إله سوله

واذري ذهب يا مشط

يلخلگك...اشطوله !

بطول الشعر ...

والهوة البارد....

ينيم الگطه

تو العيون امتلن ....

ضحچات ... وسواليف

ونهودي ز مّن...

والطيور الزغيره...

تزيف

يا ريل ...

سيّس هوانه

وما إله مجاديف

وهودر هواهم

ولك...

حدر السنابل گطه

*************