چم محطة ليل
چم قطار يصيح
وتنزل ناس وتصعد ناس
ومكومة جنط الايام كله للسفر
گاعد بشباچك من سنين انت وهل دفاتر
المن تگص التذاكر
تركض تشيل الجنط والحزن المن
ناس ما منهم گمر
ناس مايسون خاشوگة شكر
ناس وگعت ناس
ويثاوب طفل شمسية ظهر توديك بعيد
والناس الردتهم
نسو من سنين اسمك والمحطة
وگلبو دموعك نهر
لابد يردون باچر سوي نفسك ماشفتهم
بالك يحسون انت تذكرتهم
اثگل شوية ياگلبي
مرة خليهم محطة وانت سافر
انت والدخان والمطر
ادري بيك تريد تبچي
ابچي وحدك
بس احلفك ياگلبي ياچبير لا ينخطف لونك
لو شفتهم
سلم بسرعة ولو نشدوك تعرف واحد يگص التذاكر
كگهم الشباچ گصلكم شهر
ليست هناك تعليقات:
إرسال تعليق