حن ....
وانه حن
و أنحبس ونه....
ونمتحن
مرخوص بس كت الدمع
شرط الدمع
حدة الجفن
**********
جفنك جنح فراشة غض
وحجارة جفني وما غمض
يلتمشي بيه
وبه نبض
روحي على روحك تنسحن
حن بويه حن
***********
عيونك
زرازير البراري
بكل نشاط جناحها
بعالي السحر
والروح مني
عوسجة بر
ما وصل ليه النده
ولا جاسها بگطرة مطر
وصفولي عنك بالنباعي تفيض
وتعنيت ليله ... وي الگمر
وصفولي عنك كل مسامة تفيض
منك عطر .. يلحسنك نهر
تنزل بصدري وي النفس وبدمي
غصبن تنعجن
وأشهگ وأصعدك للسمة
بحسرات وبعنة حزن
حن ... بويه حن
**********
شفافك ولا گولن ورد .....
عنابه معگودة عگد
تمتلي بگد ما تنمرد
لا هي دفو لا هي برد
***************
سكتاتك تشكل خواطر بالگلب ...
مالي عرف بيهن گبل
مبروم برم الريزة
يا ريان ومخوصر خصر
لف العگل
كل چلمة منك ...
نبعة الريحان .. بالدلال ...
ما تحمل ثگل
وصفولي عنك
وردة القداح ريش جناح
زاهي بالسحر
وصفولي عنك
شال منك غيظ بستان الورد
والنرجس الرايج سكر
حني بفوازير ولحن ...
حنة حمامات السجن
حنة إلي ...
حنة إلك ...
واللي يعجبه خلي يحن
حن بويه حن
*************
آنه من أشوفك
يمتلي الماضي الجدب
زهرات بيض من الوفه
وروحي سواجي من الحنين تصير
وأنتبه وكت بيه غفه
يا محجل لون بيه ردود
أرد أردود للعشرين ....
من عمر الجفه
وأنصف عمر منك
نصفته بالهجر ...
والهجر منك ما كفه
حتى الهجر يا روحي
منك ما كفه
وگلبي عله هجرك گام أيحن
حن ... بويه حن ... حن ....
وآنه حن
وأنحبس ونه ...
ونمتحن
مجبور أرخصك على الدمع
شرط الدمع يچوي الجفن
ليست هناك تعليقات:
إرسال تعليق