مره مره

الراحل كاظم اسماعيل الگاطع

.....

مُرَه مُرَه مُره مُرَه عِشرتي وياك مُرَه
ومن أريد أنساك يمنعني الكًلب ويذبله حســـــــــره
ومن أريد أنساك , يعرضلي الدرب ويكًلي إلك خطوات
ذكــــــــــــــرى
ومن أريد أنساك تذكرني الملامه
وشنهي ربحي وياك واللي مادروا كًالو تخســـــــــــــره
آنه شنهي الماخسرته وحتُى أخسره ؟
ويانهر يعتب عليٌه ... ؟؟
حتى بجناح الكًصب روجات أعبره ..
وياجبل يصعب عليك
حتى أذب حبال روحي إكًصايب
أعلى جتاف صخره
وياعظم تتصوٌره إلتمْ !!
حتٌى يم بابك عشر كسرات أكســـــــــره
مُرَه .. مُره والمراره إتزيد لليمشي إبجزيره
 ومالكًه وسادة محبه إتريح ظهـــــــــــره
والمراره إتزيد للمايلكًه ظِلْ وينتجي إعله الشيب عُمرَه!!
ويا جمرتي الماطفَتْ
حَسٌبت يطفيها دمعي
ثاري دمعاتي إعله خد النار شذره!!
إنته من دكًيت بابي
جبت وياك الحزن خطار ماين
والفرح طلٌعته برٌه!!
آنه من شكًيت زيجي إحتركَت إيدي
وانته من شكًيت زيجك شفنه كًمره...
كان عمري نهر صافي
ومايه غافي
وخنجرك مثل البلم بالليل طرٌه !!
ويانهر والحسره حسره
كون أشوفن سندبادك
شايل إعله إجتافه جزره بكًلبي حسره...
كون أذب ثوب الحزن وآنه بشبابي
والحزن عالخد أســـــطره..
 هيٌه حسره وأمنيه\ نسميهه فكره
 كون أشوفن سندبادك
شايل إعله أچتافه جُـــــــزْرَه
كون أشوفن مريمَك ما بيها لولـــه
ومن صِدِك نلكًاها عَــــــذرَه !!
 هيــٌه حسره ..
وعشره مُـــرٌه 
والمراره إتزيــد للمايلكًه فـَـيْ
وينتجي إعله الشيب عمـــــــره

حمام نسوان

مظفر النواب
......

حمام نسوان

حزنك چماله شته

وگاعد لوحدك غاد بزويه عمر

والگهوة چنهة سنين نطرت ناس

مسحتهم صفنتك

مطر كلش مطر

والشارع مغوش حچي

وريحة ناس مالك شغل بيهم

عينك مرايه وكت ما بيهة احد

وانت ضايع مثل ورگة يانصيب انتهت

وتدور الجرايد بلچي ريحة وطن

وتغمض عيونك وين راحو

يعني حلفو ما يجون ؟

تمسح الليل والمطر

ترسم على الشباچ دويرة صحو

برجفت چفوفك بلچي جيتهم تشوفك

ما اجو شسوي يعني ؟

ما اجو

تثاوب تعد الكراسي الفارغة

تعد الليالي الضيعتهة بهل زويه

وتصفن بواحد گبالك

بلش يزنجر مثل شرطي بعيد

انت والشرطه عرف من زمن المرحوم ادم

تطرد افكارك

تلم روحك تصغر بالزويه وانت عالم

تحلم بحمام ريحه مستحه ونسوان

بين فخاذك يدورن على الصابونه

ويصبن نهدهن والمسچ فوگاك

وطاسه ضحك

وانت بگد الاصبع

صوتك صغيرون يلعلع

يبدن شويه اصابيعك يفهن

يبدن افخاذك يرطنن

تبتدي تحب التمر

يوگعنلك جلف

تلمع مثل قوري صغير

وتتراعش ركبتك

تنظف انته !

لچن توصخت نظرتك

مدري وين تزرزر عيونك بالزواغير ؟

وانت صغير

وانت صغير لگطه مسج و زواغير ومطينه حسبتك

ياخذنك بالمناشف

حيل ينشفنلك فخاذك حيل 

وتگلهن شنو الصابونه من جديد ضاعت ؟

يضحكن ساعات

لليوم الضحك بأذنك

يدفننك دفن جوه وزرهن والروايح

لچن العصفور الصغيرون مارح

يضحكن وگلوبهن تسعر جمر

گاعد انته وحزنك الما ينتهي بگهوة بعيدة

يجي شرطي جديد بالكاغد

ينشدك

وين حمام الزلم ؟

تصفن !!

زلم !!

ضلت زلم ؟

وتدير عينك غاد

وتمشه بجريدة لچن يصب الدمع

نهر يرسم على حروف السود

وكربه مسيسه

كربه كلش لچن تشيل الوطن فوگ الدهر زفه شمع

يا شعب لو شفت كربه الزمن لاعب لعب بيه

وحزينه وراسهة يلعلع لالله مكابر وحب

يا شعب هذي كربتي

وفوگ هل الايام شموع حمرة تشتمع

صاحت الدنيه عليه ثگلت كربتك

خلهة تثگل

وين ما اسمع غريب يلوب اشيله

يگلي تغرگ

يا عساني بعشگ اغرگ دوم 

ولا وحدي اطوف بلايه ديرة

وحبلي منكم ينگطع

رساله ام

واحدة من اهم قصائد الراحل كاظم اسماعيل الگاطع
وهي قصيدة من بدايته الشعريه
نسبت لمظفر النواب في بادئ الامر لجرأتها وتكامل صورها
حتى نفى النواب ان تكون له
.....

رسالة أم

يَبنـي خنگو كــلْ ضـواي ، وذبحـوا بصينيتـي شمعــة َ

وَجهــك اليضحـك ييمّـة مغنــدبْ ومابيـه لمعــــه َ

والكمـر شّــد نكـلة جـاي إيشيــل ، ضَـل بـلا ضـوه ، جــا شنهـي نفعــه َ

والمزابــل حَولـوه ألنـّه .. مكـابــر

يبني كــل طـّـرة فـَجـر توصلنــي دفعــة َ

يبنـي والبستان الأخضر ، مصوفـر ومسلول زرعــة َ

والعكـارب تنكــط بكــل دَرب سِمهــه.. وعـدنـة مَحسـود التـلسعــه فـرد لسعــة َ

وخــلي عكـربهـم أبــدربـي .. وكـل وكـت يـلسعنـي لســعـة َ

مــا أكـولـّن آخ منهــم ، لا وحــك كـلمـن كضــه .. ومــا دلــة عـدوانـة على ربعــه

يبني والسلف يالكل لحم موتاه يبني

وما لكه الخبزة التشبعه

وذني حلوات السلف باكو كحلهن

والرمد طش وترس كل عين وسعه

جينا واحدنـا ، أتطـوة الريـح لــو هبــتْ .... تـدفعــة

بينـي شحجيـلك هضمنــة .. من إجينـه أنواجهـك ، مصباح جمعة

عنــدي أبــوك ، أعــمى ضـريــر .. وذن خـَواتــك بقـّـن سبعـــة

ويــم سجنهــم صَـارت أعـلينـة البنـادق ... يبني فـزعــة

واحــد بعينــي يحـط ْ ، يايمــه ... أصبعــة

واحــد يشيــل شيـبـت أختــك .. راســهـه بشــارع إيفــرعـة

وواحــد يشتــم حزبكــم .. وأنــه أسمعــة

وواحــد يكلـله ، أم الشيـــوعــي .. أنطــوهة دفعــــــــة َ

..... وتهــلْ دمعـاتـي مثــل رايــة حـزبكـم

دمـعة تجفـي الحـال ، دمعـــة

وليـــدي .. ماخلونــي أجيــك .. وعـّـز علي منشور حزبك

يبنــي بالعلاكــة أرجعــة

يبني بسمــار الـدرب ، نابـت بجسمــك ، لا تمــل منــه وتشـلعــة

ولا تـكـلفْ نــذل من عــدهم يشلعـة

وليـدي بيــر اجـروحـك أشما فاض .. خـّـل دمـة يسيـل .. ولا تمنعــة

وأدري جــلاد السجـن ، ســاطورَة جـايـع .. كصـلــة مـن زَنــدك ، وأشبعــه

حـَـدوا ابضهــرك خنــاجـر .. وأنـت كبلـك كــم شهيـد العبـر الثـورة ، عـلضـلعــة

..... وهنـــاك .... لمـّــن التــاريـــخ يصـــحه َ، والعشيــرة تـصيــر فــزعـّـة

أهنــــــــــاك أفــك صنــدوك كلبـــــي ...... ودفتــــر التــــاريخ أطـــلعــة

ويـنــــة المـجـَرعـنــي مـُـــــــرْ ... مــُــــريــن أجــــرعــة

وهنــاك عــرسّــك ، وبيــرغ المَغـســول بــالــدمْ

أهنـــاك راســــي عــالـي أرفـعـــة .. عـــالـي أرفـعــــة