جنح غنيدة

رديلي الفرح رديت

معضد باب يبچيني

واحن حنة حمامة بيت

مثل الطاگ محني عگادة ع المهجور

يلتم العگد بيه ويعبرني ثلاثيني

جنح عصفور .. تايه ولعگود تدور

للفضل نشرنا جفوفنا جناحين

صرنه بلحظة طيارات وغنغنه

وجرح جنح الطفل يا طوفه غصن التين

وجنح غنيدة دگ جنحي وكسر عمري

وعبرنا سواجي وبساتين

بالحفره كبرنه سنين

وردينه لاهلنا هدومنه تنگط

تنگط محبة وطين

يا غنيدة امس يا حلوة الحلوات

صار العمر طوفة طين

وغفيت ولگينه الدرب والسمار

وقمر الدين

نتختل وره النسوان والشياب

وندگ المحلة الحلوة باب بباب

لغنيدة امس 

للضحكة ردلي جناحي يرجعني

وتغيب الشمس خضره على محجر الجوارين

والمح عمتي من بعيد وتضمني بعبايتها

واحس البيت .. 

عمه الشمس غابت وانت ما رديت

عمه الشمس غابت وانه ما رديت

رديلي الفرح رديت 

رديلي الفرح رديت

سفن غيلان ازيرج

زلمنه تخوض مي تشرين حدر البردى تتنطّر

زلمنه اتحز ظلام الليل تشتل ذبحة الخنجر

زلمنه الماتهاب الذبح تضحك ساعة المنحر

يساگي الشمس من عينك ابعز الشمس حب اخضر

لون حلت نسمة ليل شعرك تنشگ العنبر

أحط الحجل للثوار گمره زغيره على المعبر

وأشيم أترف النجمات فوك شراعكم تسهر

سفن غيلان ازيرج تنحر الذاري

لون ودت سفنهم يمك أخباري

وحگ عينك احط الروح عل الساري

وأگل الحسره بشليلك واشوفك ازغر اسراري

وأفك الشبگه من ابعيد أغله شراع

أشبگك شبگة النسمات للنعناع

ليش الروح يامدلول يمك تنشره وتتباع

زلمنه اتخوض مي تشرين الأول

حدر البردي تتنطّر زلمنه تغني والخنجر يشگ الروح

لون كل الگصب غنه بحنيني لشوفتك يا أسمر

يسيل الگصب سل اصفر واظن المأي يتمرمر

واظن حته النجم يطفة زراگه ولا بعد يسهر

سفن غيلان ازيرج تضوي بالعبره

ياغيلان گلبي شيصبره

اخذ كل الزلم وأملي السفن ياعيني الله وياك

وفد چلمه عشگ حلوه اظن الها مچان هناك

ذبهة بسكتة الغبار ياغيلان

خلهة اتعانگ السكان ياغيلان

شارة نصر للسفان ياغيلان

يامعود دخيل امروتك السمره

دخيل الشوگ احب چفك

احب ايديك وشوف شفاف لو جمره"

على گد البريسم

عله كد البريسم

صفنتْ يملثّمْ بالموْزَرْ

والغارهَ تـﮔـولك للغاره

ولنْ بيرغْ وايدي عل الصفنه

ولو ﮔامت ريح تطﮔ ناره

وصفين الدﮔ بعضدينك

مشطين تزّتْ العبّاره

مودّعْ بالبارود العنبرْ

يلعينك شـﮔ الله بخنجرْ

وحزامك عل البشت الماطرْ

عربيد مناطر عل الورورْ

ومروز الريحان تهمهمْ

لاذيالك حته الذبلانه

حتّه المكسور بخاطرهه

وعطشانه تـﮔلك عطشانه

وزناد الكسريّه يتوّزْ

والضكك بحزام المرعز

يلممشاك بهونه وتردس

عزبه وشباج من اعتابك

وحده يعرّس

هونك هونك

كلش هونك

عدوانك بالزور نطاره

فييني بصدّات عيونك

جيتك أركض للدغّاره

وخذني بجفينك للمفرﮔ

أشبع موت وذبني حجارة

صدّاتك شذراتْ المحزمْ

والخزره بريسم وبشاره

وتسهرلك كسريّه تهلهلْ

بعيون المخفر هدّاره

ومن ديره لديره نوصيلك

وزلام بذجرك تتباره

وريجك طعم خيارة شاطي

ورشة مزنه

ويتشد بطلع الزهدية

من تشوفك ضك مشابكنه

وتتنده سواجي المهجورة

وثوبي تلف عليه طيوره

وتستعدل روحي المديوره

وضكني الجمرة بضك الدله

وطعم الهيلة يـﮔب بجفّك

والشمامة وورد العلّه

وعرس امك وامي ويتلاﮔن

والسبعه يذبن ميتهن

بالـﮔمره وخشلك يالهاون

والـﮔمره بميّتنه تغرّزْ

والضكك بحزام المرعز

ﮔمرات ثلاثة ولا بيّنْ

طارش منك نمشي لناره

وخزامت عرسي عل الشرجي

تشمشم بارودك وأخباره

وأهجس كسريتك بالحندس

كللي ـ شجم كسريّه معرس

هونك هونك

كلش هونك

عدوانك بالشط انطاره

*****

خلي الشبكه بعمر الورده

وشبكه النوبه

وشبكه النوبه

وحد ما نذبل حدر الغتره

وسجّة كحلك دﮔهه بعيني

يموت حسابي

وتطفه العبره

وكل شهـﮔه التشهـﮔهه بصدري

تدﮔ لك عشره

يالساكت والتحجي طيوفك

وأتدّافع آنه وكل ﮔلبي نريد نشوفك

واشبع منك؟

كون الطير يشوف الماي

ويشبع منه

كون الترفه

تحل ﮔذلتهه

وما تفتك بيبان الجنه

وكون أتمنه

وكون اتمنه وما مش حدر ﮔليبي عريضي

شجرن ﮔمرات الصبحية

وعطّ الجول بنفحة عنبر

وآنه الما نيمني عيوني

كل ليله ولنك ﮔالبني

وكاسر ماي الظنه بروحي

وما تنزل وتبور ظنوني

ونزلت للشط كل مكحله

تفرّ الجرفين بطرتهه

وشبعانه سوالف ومشابك

ليش انه بعشـﮔك سياحه

وكلهن طابـﮔ

موش حلفنه وكلنه نموت

وما نتفارﮔ

جا ليش بساع تفارﮔنه

جذاب امشينه مزعلينك

جا دلحـﮔنه

نفك لك كل بيبنان الجنه

وفوك الجنه وفوك الفوك

الفوك الجنه

مو بتوهدن، وياك هواي توهدنه

لو رديت أعلـﮔ دايرنه

وجياتك أفرش بيديهن

ضحجه وحنه

وافرش لك بالعتبه شليلي

وثوبي الأسود

يفتك حزنه ويفرح نيلي

وتخضّر الرزه من دموعي

وضحجة وبجيه تطﮔ بعيني

لو رديت انته وذاك انته

وكسريتك فوك تفييلي

اتبلل واتفتفت بيدك

وبتالي زبونك المطرّز

امسح ضحجاتي وبشليلك

موش مصدكه وموش مجذبه

وموش اﮔدر، أﮔدر احجيلك

بسّنج بسج يا روحي

وهمانه وما مش من رده

تظلين حبيبه عل السده

تظلّين تـﮔلبين عيونج

بالعبّاره وباليتعده

وقداحج يتناثر منج

والليلة طويلة ومطّاره

هونج هونج

كلش هونج

للشامت يضحك مشواره

وللمامش يضحك مشواره

_______

ان شاء اللع يردون كلهم

توقع قريب

الباصات على اهبه العودة الى العراق

وطفل دفنت امه بالسيدة زينب بدمشق

ان شاء الله يردون كلهم

وانت تتشله لسطح الباص

وتحمل حزنهم والجنط والعمر وشويه اماني

وتضحكلهم وانت ترحي گزاز

عالضلو اجباري بتربة الغربة

وينطروهم اهلهم

تلتفت ليغاد وتصعد طفل بوسته امه والقفل من الشباچ ونذرتله وغفت غفوة طويله

تمسح بوصلة قميصك خشمة الصغيرون

تاخذ چفة بايدك نهر من خباز

تضحكلك مثل فانوس زفة بلا فتيله

تنزل الدمعه على خدة گزازة خضرة

يغوص بالكرسي

مثل صندوگ فضة صغير

ضامم ضحچة امة بالحرير بليل صدرة

وين

وين نروح عمي

گلبي الليلة يوجعني اريد امي

تشوف بعينة حفرة شلون حفرة

تگعد تسكتة

الگمر لو غاب يرجع عيب تبچي

شوف يوليدي البيارغ كلهة خضرة

وگضن الباصات يمشن

وامك تنطرك ورة الچولة الچبيرة

امي انه

ويصفن بحفرة بعيدة 

ويبتسم لله ببراءة

وخشمة الصغيرون نايم

چنة حضرة

امي خبازة

اخدهة بچفك بهيدة

تراهي الدنية عضتخة بچثير چلاب

وتگب بحزن نضرات ليل غبرة

امي

يصفن غاد

ودولاب الهوة يدور بنظرتة

بلاد فوگ بلاد

بلاد العرب اوطاني وبليه بلاد

امي وامك تگله وجميع الناس

وتبوسگ گبلنه

وترجف شفافة برجفة شفافك ببغداد

اي بغداد 

من تجيب اسمهة شفافك تضوگ الثرية

ويمتلي گلبك طرب وعناد

ويگلك بعد احلم

ويذبلك على الخبازة حامض حلوة 

مثل شفافة تاخذهة بدمعتك

تنزل بسرعة

تضم الدمع لچن تمزل الدمعه 

تضحكلك صواني شموع

وانت تبتسم شمعه

ويهوميلك عليش نزلت

تسكت

صار الملاگة صعب

والغربة صارت صعب تندار

واخاف يصير المزاود واضل ساكت

و بحر غاد

مو كلمن يحب بغداد يحب بغداد

يا ناس العشگ اسمة عشگ

ويفض نوبات العشگ نهرين

ودشداشة طفل يركض يريد الله

يگله امة خبازة

وليالي طويله لولتلة

من البصرة لثلج الله وطنة

والگمر نوبات يگول اسود

وطنة وين اكو طيبين

واطفال وعرب واكراد

وطنة وين اكو نخلة ونهر

وبيوت تتلگة الغريب من الگلب

وتگله انت البيت واحنة ظيوف عندك والملح والزاد

فارگيت انت السفينة

فاركًيـتْ إنتـه السفيـنَه وآنه جايبلـَك بحــرْ
خِفِـتْ !! مايكفيـك عشكَ الناس
توصــلْ فرح كَلبــكْ ..
كَـٌعديتْ الثلج من نومــه الثجـــــــيلْ
وسلسَـلتـْلـَكْ حزن كَلبي سلسَبيــــــلْ

جـِبتْ سلطــان الحلمْ ...
شِفتـَكْ مِثــل ممسـوح بغياب الشمس
فاركَت حِلم النـاس ومَلـٌيتء السفينه والسفَرْ
إشلـونْ كَلــبك طاوعـَــكْ
ماتكَفْ عالجيــــــــــــدوم 
وَجـهَكْ كَمـَرْ ونجـــــــــوم
تنطيــنه كل لحظـه إتجــاه الريـــــــح
نِشتـــــاكَ الكَمـــــَـر
يصعَدْ حِسـِنْ وجهـــك كَمــَر

مابجيــــتك ..... ما بجيـــــــتكْ
آنه بجـٌتني السفيــنه
إمنين ماطـكَ الرذاذ إتفكْ كَلبها إتريد تبحـِـــر
تِدري نـوباتْ السفن لو ضاكَ خاطرها
إبجُبـُنْ سفـٌانها إتســورب وحدها ؟ ؟
تدري نـوباتْ المحبـٌـه 
إتمـِلْ طبُـع محبوبـها
ويغفــه عالجتــاف الســــــهر ؟؟

مابجيــــتك ..... ما بجيـــــــتكْ
مَدري منهو إبصدري يبجـــي ؟؟
مدري منهو إيشَكَـٌــكَ إبكَلبي كواغِــــد ؟ 
مدري منهوْ إيريـــدْ يرحـَـلْ ؟
مدري منهو إيجرني بيدَر للمطـــــــر ؟
مابـِجـيتـَكْ .. درت عيني للبَحــَـر!!
أبجي المســافات الهِمتها ويـــاك !!
مابجيــــتك ..... ما بجيـــــــتكْ
إنتـه تكذب مابجيـــــتكْ 
آنه هدٌيـت السفيـنه 
وسيـٌسـتها إشراع أسَـبكَ الريــح
ولا خاروعـه عندك للمطــــــــَـــــرْ
..... ما بجيـــــــتكْ
آنه جايبــلـَكْ من دموعـي بحـَــــــــرْ

متت

متت وهمومي وسكتي

غطتك

يالچنت كلشي

أمس طشيتك على الأيام

صم نسيان

سميتك حزن

وصيت نفسي من معزتك 

تنسى اسمك

تترك السبوره سوده مثل امس

تمحيلي رسمك

بطلت أتگبگب گبالك

مثل خوفة عصافير البيادر

بطلت

اوگف اصليلك مثل كل المناير

بطلوا الجيران يتختلون بشبابيچ حچيك

كله واجوني بحسدهم شگگت كل الدفاتر

متت

متت

متت

طفيت التبرزل

نيميت المطره بعشوش المشنشه

وحــــــــيل جريتك على

النسيان

يا سرجي خشب

بطلت اراچي ---

دفنتك بصبخة فرح بالروح

وهديت السواجي----

الروح روحي وبطلت ولويت اذنها

شرد اگلك يا حزنها

بطليت

طلسم فكيت سحرك وانتهيت

طلسم مكتوب كلشي

ومامش شلون ابتليت

ما اچذبك

انا ناسيك وبچيت

شلون ما اسكت بروحي

تلتفت للماضي تبچي

تحط على الحايط حلمها

هي مدري حايط الأيام يحچي

وانا صافن

مثل المحجر على الريح ارتچيت

لك لا متت انت

ولا انه احتييت

لچن الأيام ماتت

غلطتك يالچنت كلشي

ومادريت

غلطتك صلحها بعدك

انت كلشي

سالوفة ابو سرهيد

ﮔامتْ هيبة يا بو اللّيل وخيوط الفجر طرزَنْ وراك اخبار عَالمكشوف يا خنجر عَلِمياسر عليه اسم الحزب معكوف يمْوصّل مكاتيب العرس للماوراهم غير الفناجين والديّان وسالوفة وكتْ غـزلو عليها العمر ريحة صوف يمسوّي الـﭽـلاچ الخيزان أنهار من لون البنفسج وحدكْ السكّان والشادوف يلْوحدك من تسولف،  اشوفن كل حرف منّك مشطْ ياكل سبعْ طلقات وكل ركزة ذهب، والشين حمالة صبر وسيوف اسولفلك اسولفلك  سوالف ليل،  وحصيني نفط، واحزاب اجاهه الموت طرگ الله وكراسي بالوزارة.. ولبستْ النفنوف خل يـﮕـعد فهد ويشوف يغاتي بغيبتك ﮔام الشـﮔنـﮓ، والبثل، والزبل، والخريط وانته تـﮔلي لو خيط الفجر بيّن.. الزمو الخيط، ولتعوفوه ما ﭽذّبت! لكن ﮔلّي وين الخيط؟ وين الخيط؟

مضايف هيل

مَيلن . لا تنگطن كحل فوگ الدم

مَيلن . وردة الخزّامة تنگط سَم

جرح صويحب بعطابه ما يلتم

لا تفرح ابدمنه لا يلگطاعي

صويحب من يموت المنجل يداعي .

***

أحاه . شوسع جرحك ما يسده الثار

يصويحب . وحگ الدم ودمك حار 

من بعدك ، مناجل غيظ ايحصدن نار .

شيل بيارغ الدم فوگ يلساعي

صويحب من يموت المنجل يداعي .

مَيلَن . لا تغيظنه بِچه صويحب

وبجفنه النِدي نجم الكحل ، غايب 

لو يشرِگ اردود ، المسج ونعاتب

عتب النده ، بروح البردي يلناعي

وملامح عيون انعجه ، للراعي 

لَتفزعن ، مثايه العين . شِدنه

مَيلن وردة الخزّامة ، على الحنّه

صويحب . ما مش صويحب أبد مِنّه .

هذا إيشان ، ما ينذل للگطاعي

وبليل الخناجر ، منجله يداعي 

ودَّن على المكاحل يا مضايف هيل

غطنّه ، بكحل دخله ومحبة ليل

عگبك سچة يصويحب هجرني الريل 

لتشيلك مذلة الريل يگطاعي

من ريل { الرميثة } المنجل يداعي .

هاي آنه اللّحضنك لا تلم روحك

اضمك بالگصايب عين لتلوحك

يصويحب . أفيِّ الفيه لجروحك

يتلاگن عيون الذيب بشراعي

وأحاه أشكبر ضحچات الگَطاعي ؟

صويحب على العگل صندوگ عرس اچبير

حزمه من الحصاد . ايلفها طيب چثير

وين اللي يگلي { فلان } وين يصير ؟

أوصله وأدگ شراعه بشراعي

صويحب من يموت المنجل يداعي .

صدور الغيظ اينفثن نار على المشرگ

وچفوف الفِلح ، لمة شمس تحرگ

ها . يلحُكُم . هاي شرايع تمزلگ

والخنزير يزلگ بيها يالراعي

وصويحب يموت ومنجله يداعي .

حا . يصويحب الدگات . ايفتحن دم

وبشيمة عطش تِندَه اليشامغ سم

يلنجمك حَمَر عدّه ، العگل تلتم

طيب الذات خاوه الذيب والراعي

وتوالم عرس واويه واگطاعي .

صويحب . هاي حبتك لا تطول الموت

من تسمع شچية الفِلح رِد الصوت

هاي الدنيه عيب يضيع بيها الفوت

البِد . البِد ابدمك يلگطاعي